فازت قصيدة " ما وراء الكوابيس للشاب بيشوى مجدى بالمركز الثانى فى مسابقة شيربوك للشعر العامى والتى ستنشر بعدد شهر يونيو 2016
وهذه القصيدة
وهذه القصيدة
علاقتك مع نفسك عكسيه
وبتوجع فى حاجات بتحبك
وتحب حاجات أصلا وجعاك
كنت صغير فجأه كبرت
وكبرت بتصغر من جواك
شكلك عجزت يا واد
وقلبك عجز..
من فضلك ركز..
عارف الأرض اللى تدور
وتقف بعد ما تلف
كذلك جرحك من الناس بيخف
ساعات .. ومبيخفش
السنين ما بتلفش
وإن يوم كبرت ما إنتاش راجع
لطفولتك يوم من الأيام
وإن حاولت ترجع
طب هترجع فين .. وإزاى .. وبكام
عندك كام سنه دلوقتى
ولا بتتلخبط فى الأرقام
حياتك حلم لناس كتير
ومازلت بتستنى الأحلام
إتعايش ويا الوضع الحالى
عمر الزمن ما يكون خالى
أبداً يوم م الذكريات
عمر الليل ما يفضى أبداً
من فرح ودموع البنات
عمر الشتا ما ييجى فى صيف
عمرك ما هتقطع حلم بسيف
عمرك ما هتطلع أبدا راجل
خد بالك جدا من دلوقتى
كمان شويه إنت كمان
هتكون راحل..
كمان حبة وقت كُتار جدا
أو حبة وقت ما يتعدوش
قوللى صحيح..
إنت ليه بتلاقى اللى ما بتحتاجلوش
وما بتلاقيش اللى بتحتاجه
عارف .. إنت طيب جدا بسذاجه
واصله لمرحلة غباء
بسأل مالك فترد..أنا كويس مفيش حاجه
وإنت ميت من الفراق
سابوك وحدك ليه فى النُص
أبوك كان واعدك..ساعت ما أخوك كان بيرُص
هدومه ف قلب دولابك.. وهمومه جوه جيوبك
فتتخانقوا بالساعات.. على أتفه الحاجات
وتسيبوا أهمها..
فبتاخد نفسك من جواه..وبياخد أحلامه من جواك
وينده عليك تلمها..
أنا عارف واحشينك جدا
وبتتمنى ولو مره يعودو
بس قصاد الموت يا صاحب
هتلاقى الكل بينسى وعوده
وده حال واحد إتمنى وجودهم
والأمنيات مش بيفيدوا
عاش يحلم بيردوا عليه