انت فعلا محسود؟.. ولا دة قُصر ديل؟ بقلم "مى الفحام "

كل واحد مننا عنده لحظات ضعف ومراحل فشل في حياته، بس كام واحد مش بيعلق الفشل دة على شماعة الحسد وقادر يواجه نفسه بإن هو اللي كان غلطان أو مقصر أو على لأقل حاسبها غلط؟


انت ما خسرتش شغلك عشان ابن عمتك حسدك إنك لقيت شغل بمرتب كويس وهو لسة عاطل، انت خسرته عشان كان مطلوب منك تحقق نتيجة متحددة ليك وما قدرتش توصلها في الميعاد المطلوب وكان طبيعي يقولولك شكراً على كدة ويعينوا حد بديل، ودة موقف بيحصل لمليون شخص في كل مكان في العالم.

الرحلة للي كنت حاجزها اتلغت عشان الجو مش مساعد حالياً في إنها تتم ودة شيء متوقع والطقس دة بيتكرر في الشتاء من كل سنة، مش لازم يكون فيه قوى روحية خارقة هي اللي نبرتلك في السفرية.

مفيش ولا وظيفة بتتقدملها وبتعدي الإنترفيو عشان انت خبرتك في المجال اللي بتتقدمله قليلة وفي نفس الوقت مش راضي تشتغل في أي مكتب ببلاش من باب التدريب واكتساب الخبرة المبدأية لأنك مش عايز تضحي بوقت أو مجهود، ودة سبب كافي جداً إنك ما توصلش أبداً للمكان اللي بتحلم بيه، فياريت ماتقولش فيه حد بيحسدني، مهو انت مش بتشتغل ولا بتقبض أصلا حيحسدك على ايه دلوقتي؟

أبو خطيبتك بلغك بفسخ الخطوبة عشان انت وعدته بتسديد تمن المهر والتشطيب في ميعاد محدد والميعاد عدا عليه شهرين وانت لسة ما خلصتش الالتزامات اللي وراك لأنك من البداية ما كنتش حاسب حسبتك صح، فهو اتأكد إنك مش حتقدر توفي بوعودك وقرر يجيب من الآخر، الموضوع مالهوش علاقة بقَر صحابك عليك عشان انت أول واحد من شلة الكلية قرر يخطب، علماً بإن جايز جداً يكون من مصلحتك عدم إتمام الجوازة دي وكل ما في الموضوع إنك مش حتقدر تاخد بالك من دة دلوقتي.

انت مش عارف تشتري لاب توب بدل بتاعك اللي باظ عشان الأجهزة غليت بعد زيادة الدولار ودي أزمة البلد كلها متأثرة بيها، مش عشان أختك كان عينها في اللاب الأولاني.

رجلِك اتكسرِت عشان اتزحلقتي في الشارع لأن الطريق مطين بسبب المطر، مش عشان بنت البواب كانت مبحلقة في البوت الجديد.

مشروع المزرعة ضرب تفليسة عشان انت كسلت تحقن الحيوانات بالأمصال اللي قالك عليها الدكتور البيطري من ساعة ما جيبتهم لأنك مستخسر فلوس الدواء، مش عشان شريكك القديم عاملك عمل وراميه تحت باب الزريبة.

ابنك عيان على طول لأن مناعته ضعيفة عشان مارضعش رضاعة طبيعية وهو صغير حتى اللبن الصناعي اللي كنتي بتجيبيه ماكانش فيه كل أنواع الفيتامينات، النتيجة الحالية أمر متوقع جداً.

انت مش راضي عن أي خطوة بتاخدها في حياتك وقاعد بتندب حظك مش عشان هو وحش وهو أصلا مفيش حاجة اسمها حظ يمشي مسار حياتك كلها، إنما عشان مش عارف تتقرب لربنا بالقدر الكافي وتدعيله عشان يسهلك أمورك، لأنك اصلا مش بتصلي... يعني مش بتصلي ولا بتطلب من ربنا إنك يساعدك – في دعوة صادقة- وبعدين بتستغرب لما حياتك تتلخبط وتقول أكيد بسبب الحسد؟!

محدش يقدر ينكر وجود الحسد وتأثيره لأنه مذكور في القرآن، إنما كل أملي ألاقي الناس مش عاملاه شماعة لكل غلطاتها ومشاكلها، بصوا لتقصيركم وللأسباب المباشرة اللي ممكن تكون أوضح من الشمس ولما ما تلاقوش أي حاجة منها متوفرة، ابقى ارجع سبِّب مشكلتك للحسد، يمكن ساعتها تبقى متصالح مع نفسك بجد.

مى الفحام